The Lobster

朋友拍拖，劈頭第一句 「我地好夾，我鍾意~」有幾夾?  「總之好夾，好正呀~」如果有一日變左，唔再夾，咁仲鍾唔鍾意?   「...............」

The Lobster （港：單身動物園）未來世界單身者通通被趕入酒店，45日配對不成便被動物化 (勁過被消失)  ，真正寂寞都有罪。點解係45日?  你不如問下點解女人一定要30 前結婚? 反正大家都唔知點解，總之要跟呢個遊戲玩啦，人做乜你做乜，人著NMD你又著。例牌有人玩得叻又有人唔識玩仲有人唔想玩。

但其實點解一定要跟呢個遊戲玩?  真係無其他option?

入森林後電影忽然變調，身邊友人鬧爆話無謂。嗱，真係要平反。情場失敗一時諗錯決定要做孤獨精一個人食飯一個人睇戲一個人啪啪啪既，一定會明呢個轉折位。  (一個人跳舞果段真係笑住滴左滴眼淚出黎)  曾經自以為可以好絕，戒七情六慾。但姣婆注定守唔到寡。所謂 「一個人」都不過係逃避問題，自掘墳墓。

然後柳暗花明搵到真愛又點呢？結果又回到原點。講到尾唔好乜都話係社會既錯，成日計住度住、最荒謬果把愛情尺，原來一路都係自己個心到。究竟要搵個人夾定搵個有人愛係無灰色地帶。一日計住，插盲對眼個心眼都唔會開，遲早出事。

一個人又唔得兩個人又唔得，可以點？ 唔知呀，或者到最後齊齊化做齊蔭老母，做隻唔識愛冷血龍蝦，遺臭萬年囉。