樹大招風

先黎題外話，明歌《美麗的呼聲》上，《十年》導演歐文傑被邀上環節《龍門陣》，期間欲言又止，處處難為，樹大果然招風。

所以知道歐導參與《樹大招風》時，直覺不會是另一套《十年》（如果你因為咁入場、咁未免太天真同有少少儍）。但意想不到電影仍然圍繞香港，只是換個方式 :

究竟香港人衰乜野?

面睇整齣電影是中年男人各自唏噓文藝片，當作《男人四十》大賊版亦無不可。一個半小時並無高潮迭起，唔覺意入場以為係《暗角戰》啲friend 就一定𠝹凳。但凡事睇定啲先， 放低心情嗒真啲，其實戲味真係十足。

（以下有少劇透）

97後香港太平盛世AK47不再，因為黨就是最大黑社會 。97 前三位大賊王早醒水各自退下。但一日大佬終身大佬，又係咪咁容易接受到、應付到呢?

有人過到意氣風發想繼續貪。有人轉行以為得但又唔甘心。有人以為自己好小心但其實唔知想做乜。

慾望膨脹、意氣用事、於進退間迷失，最後因為貪· 嗔· 癡而自取滅亡過唔到97既，其實又豈只三大賊王？

難得劇本完整前後一氣呵成眼高無手低。 為完滿貪嗔癡三件事，三王結局舉動難免匪夷所思，似乎說不通。但走火入魔正是如此，現實有時比之更荒謬。

正如我成日都問點解世上會有蔣X雲呢啲咁不可思議既人。

Ending 有點玩味，亦首尾呼應。雖然任賢齊好任賢齊，陳小春好陳小春，但角色配合並唔難睇 。林家棟一貫亮麗演技，今次角色對他來說不過一塊蛋糕。

故事原有點不夠充斥場面，但鬼斧神功剪接實在令戲加分不少（聞說係杜sir執過） 。 細節處亦好，由小動作到小道具，甚至小春唱k都要揀《怎麼捨得你》可見用心。

不知不覺寫左好多，係架 ，好電影就係啟發人心。同成本票房係無乜關係。