< 週日童話> 湯圓

「死啦，只從上次PART 過一個EVENT，我好似有少少鍾意左隔離TEAM個東尼」

「無鬼死用，日日買早餐俾你就鍾意人，Cheap到死。你幾耐無同男人搞野呀?」巴巴拉徐徐吐出口裡的煙說道。


屌，叫巴巴拉的果然都是八婆。


「八婆，我就係諗到你諗果樣野，所以無出手囉，我都驚我係一時悶得滯所以…」

「呀小姐，唔好係我面前扮淑女。如果係竹野內豐，你估你仲會諗咁撚多野?講啦，除左唔靚仔仲有咩要考慮呀? 」

「都係例牌四寶啦」我呷了口咖啡，定一定驚道 「唔靚仔、無乜錢、個人好似好悶、同埋同屋企人住」

「死港女! 話唔定人地床功了得，賞你一棍就投降啦。咁身材好唔好?」

「一般啦，應該就無健身但有做下運動，有少少肉，無肚腩咁囉」

「三十幾歲直男算係咁啦，唔好搵基佬比。不如搵日灌醉佢，摸下副牌先」巴巴拉淫笑道。

唉，好後悔，我不應該找巴巴拉談心。

「一間公司架，佢逼我係公司後樓梯BLOW JOB咁點算呀? 傳出去我仲使做人? 家下咩既時勢搏唔過。」

「唉，考慮咁多做乜? 你三十幾歲人，咩男人未見過，我就唔信淨係日日買早餐咁簡單就可以埋你單」巴巴拉又吐了一口煙續道

「我成日覺得如果玩個TINDER 見張相OK，食兩次飯都可以拍拖既。你呢啲日對夜對既辦公室痴男怨女就直頭可以結婚啦，仲搞咁多做乜」

「一把年紀，就梗係諗清楚啲先啦。唔通仲好似十幾二十時咁成隻癲雞咁咩」我禁不住抱怨道。

「你一把年紀，除左啲頸紋走晒出黎之外，就係面皮薄晒。船頭驚鬼，船尾驚賊。機會或者成日有」巴巴拉忽然鬼上身似的，很認真地望著我說

「但呢份心動，絕對係買少見少，好自為之」

每一個童話都有美滿結局，呢個都唔例外。


收工，東尼忽然拿了一袋外賣過來。是湯圓。

「沙朗你唔好食住。我有野講」

我拿著膠羹呆望著東尼，大佬我好餓呀，快講啦。

「呢幾月好可以同你拍做野真係好開心。希望可以繼續同你做同事，但更希可以同你進一步。但我知你個婆仔諗乜，船頭驚鬼，船尾驚賊多多野諗」東尼吞了一下口水，續道

「所以我已經辭左份工， 下個月番舊公司做野。呢樣係我而家可以做得最好既。你唔係一般港女，我知你明既。至於呢碗湯圓食唔食，睇你啦。」

我望一望他，再望一望那碗湯圓，我真的很餓。

我一口氣鯨吞三粒湯圓，滿咀芝麻道 「怕你呀!」

-完-
故事純屬虛構。